Sunday, July 25, 2021

ఆకాశవాణి

 



తెలుగు భాషకే వన్నె తెచ్చిన 'ప్రేమించు కామించు పిల్లోడా' లాంటి పాటకి పాతికేళ్ళు, పనికిరాని సినిమాలకి పాతికేళ్ళు, ముప్ఫైయేళ్ళు  అని సెలిబ్రేట్ చేస్తున్న మన తెలుగు ఛానెళ్ళకి ఆకాశవాణి జూలై23 న తొంభైనాలుగేళ్ళు పూర్తి చేసుకుంది అని ఎలా గుర్తుంటుంది?

ఉదయం 5.50కి. మెలకువ రాగానే ఇప్పుడైతే ప్రక్కనే ఉన్న మొబైల్‌ఫోను  చేతిలోకి తీసుకుంటున్నాము కానీ చిన్నతనములో అయితే ముందర మంచం దిగి వెళ్ళి రేడియో పెట్టేవాళ్ళము.ఒకవేళ ఇంకా కార్యక్రమాలు మొదలవ్వక ముందు వచ్చే 'కూ...' అనే సిగ్నల్ వస్తోంటే మాత్రం కాస్త సౌండు తగ్గించి వెళ్ళి బ్రష్ చేసుకుని వచ్చేసరికి వందేమాతరం మొదలయ్యేది.ఆ తరువాత దేశభక్తి గీతం, సూక్తిసుధ అయ్యేసరికి అమ్మ స్టవ్వు వెలిగించి ఫిల్టర్ వేసే సమయానికి శాంతమ్మ పాలు తీసుకుని వచ్చేది.

ఆరుగంటల ఐదు నిమిషాలకి వచ్చే ఇంగ్లీషు వార్తల్లో "దిస్ ఈజ్ ఆల్ ఇండియా రేడియో, ద న్యూస్, రెడ్ బై " అనే గంభీర స్వరం వినగానే ఏదో తెలీని ఆనందం, ఆ డిక్షన్ని అనుకరించడానికి చేసే ప్రయత్నం ఒక మధురఙాపకం.

ఇంగ్లీషు వార్తలవ్వగానే భక్తిరంజనిలో శ్రీ చిత్తరంజన్‌గారు ఆలపించిన కీర్తనలు, మల్లాది సూరిబాబు బృందం ఆలపించిన స్తోత్రాలు, మంగళం పల్లి వారి తత్వాలు, శనివారమయితే ఒక బ్రాండుగా స్థిరపడిపోయిన తి.తి.దే. ఆస్థాన పండితుల సుప్రభాతం, ప్రపత్తి, మంగళాశాసనం, ఆదివారమయితే కీ.శే.బాలాంత్రపు వారు రచించిన "శ్రీ సూర్యనారాయణా మేలుకో" గీతమో  లేదా ఆదిత్య హృదయమో వచ్చేది.

భక్తిరంజని అవ్వగానే పొలంపనుల కార్యక్రమం.పొలంపనుల కార్యక్రమానికి ముందు వచ్చే 'ఫ్యాక్టం ఫాస్ ఇరవై ఇరవై, అన్ని పంటలకు ఎరువెయ్ ఎరువెయ్' అన్న యాడ్ ఇప్పటికీ చాలా మందికి గుర్తే, అది కాకపోతే నాగార్జున యూరియా యాడ్.పొలంపనులు అయ్యేలోపు మేము స్నానం చేసి స్కూలు డ్రెస్సు వేసుకునేవాళ్ళము.

స్నానం గట్రా చెయ్యకుండా ఇంకా వాకిట్లో ఆడుకుంటోంటే మా ప్రక్కన ఉండే అత్తయ్యగారు "పొలం పనులైపోయాయి, స్కూలుకెళ్ళట్లేదా ఈరోజు" అనేవారు. అంటే సమయం ఆరూ నలభై ఐదన్నమాట.

పొలంపనులు ముగియగానే కొప్పుల సుబ్బారావుగారో, ప్రయాగవారో ప్రాంతీయ వార్తలని అరవకుండా  వార్తని వార్తలా చదివి వినిపించడానికి సిద్ధముగా ఉండేవారు.'అల్పపీడనం', 'ఈదురుగాలులతో కూడిన భారీవర్షం' లాంటి పదాలని మా తరానికి పరిచయం చేసింది రేడియోనే కదా.వాళ్ళు వార్తలు ముగించే సమయానికి కుక్కరు మూడు కూతలు పెట్టేసేది.ఆ వెంటనే బలదేవానంద్ సాగర్ గొంతులోంచి సంస్కృత వార్తలు, వార్తలు అర్ధం కాకపోయినా 'సంప్రతి వార్తాహ షూయంతాం, ప్రవాచిక బలదేవానంద్ సాగరః' అన్న వాక్యం మాత్రం పిల్లలందరికీ కంఠతః వచ్చి ఉండేది.  

సంస్కృతంలో  అర్ధం కాని వార్తలు వచ్చేసరికల్లా పారాచూట్ కొబ్బరి నూనె సీసా, దువ్వెన్న పట్టుకుని  జడలు వేయించుకోవడానికి (జడలు లేనప్పుడు ఉన్న ఆ పొట్టి క్రాఫింగుని దున్ని దువ్వించుకోవడానికి) అమ్మ కోసం తయారుగా ఉండేవాళ్ళము.అమ్మమ్మ జడ వేస్తానన్నా వేయించుకునేవాళ్ళం కాదు మరీ అత్యవసరం అయితే తప్ప, అమ్మమ్మ కానీ బిగించి జడ వేసిందంటే మా మాస్టారు ఆ రోజుకి కర్ర మర్చిపోయి వచ్చినా నా జడ ఉందికదా అనే భరోస కల్పించేంత గట్టిగా బిగించి వేసేది అమ్మమ్మ.  

జడలు వేయించుకునే కార్యక్రమం అయ్యి టిఫిన్ తినే సమయానికి అద్దంకి మన్నార్‌గారో, ఓంకార్‌గారో లేదా ఏడిద నాగేశ్వరరావుగారో చదివే జాతీయ వార్తలు.

వార్తలయ్యేసరికి  నాకూ అక్కకీ కలిపి నాలుగ్గిన్నెల స్టీలు క్యారేజీ బుట్టలోకి ఎక్కి కూర్చునేది.వయసు మీద పడుతున్నా కానీ హీరోయిన్లని మారుస్తూ ఇప్పటికీ కళామతల్లి సేవ చేస్తున్న హీరోల్లాగ మా స్టీలు క్యారేజీ ప్రక్కన గాజు నీళ్ళ సీసా దగ్గర నుండీ, అప్పుడే మార్కెట్లోకొచ్చిన మిల్టన్ వాటర్ బాటిల్ వరకూ రకరకాల వాటర్ బాటిళ్ళు ఒదిగి కూర్చునేవి, మా స్టీలు క్యారేజీ స్థానం మాత్రం చెక్కుచెదరలేదు.  

వార్తలు అయ్యీ అవ్వకుండానే మా స్కూలు బస్సు డ్రైవర్ హనుమంతరావు ట్రేడ్‌మార్క్ బుల్లెట్టు  సౌండు వినిపించిందంటే ఉరుకులు పరుగులతో బస్టాపుకి వెళ్ళేవాళ్ళము.మహేషు బాబు అయినా ఆగడు సినిమా తరువాత ఆగాడేమో కానీ మా భజరంగబలి( మా డ్రైవర్ హనుమంతరావుని ఆ బుల్లెట్టు మీద చూసి మా అమ్మ ఆయనకి పెట్టిన పేరు ఇది)బయలుదేరి వెళ్ళి బస్సు తీసాకా ఇంక ఎవరికోసమూ ఆగడు.మా స్కూలు బస్సు కానీ మిస్ అయ్యిందంటే ఆర్కియాలజిస్టులు ఈ మధ్యే కనుక్కున్న ఆదిమానవుల గుహలాగ ఎక్కడో మారుమూల ఉన్న మా స్కూలుకి వెళ్ళడం అసంభవం.

స్కూలు లేని రోజుల్లో అయితే వార్తలయ్యాకా వచ్చే  సంస్కృత భాష పరిచయ కార్యక్రమములో నేను నేర్చుకున్న సంస్కృతం ఏమిటయ్యా అంటే అర్ధం తెలియకపోయినా కంఠతః వచ్చేసిన 'కేయూరాని న భూషయంతి పురుషం హారా న చంద్రోజ్వలా' అనే పద్యం మాత్రమే.

ఆ తరువాత లలిత సంగీత కార్యక్రమం, సినిమా పాటలు, మధ్యలో  "రామయ్యా ఏమిటి దీర్ఘముగా ఆలోచిస్తున్నావు?" అంటూ వచ్చే నాగార్జునా ఆస్బెస్టాస్ రేకుల యాడ్, తళతళలాడే తెల్లదనం కోసం వాడాల్సిన రిన్, వాషింగ్ పౌడర్ నిర్మా, ఇలా ఏవో అవసరమైన సామాన్ల యాడ్స్ తప్ప అనుబంధాలు పెంచే మినపగుళ్ళు, మీరు ఇంట్లో కూర్చుని మాకు మిస్డ్ కాల్ ఇస్తే మీ బంగారం తీసుకుని మీ కొంప కొల్లేరు చేస్తామనే కార్పొరేటు తాకట్టు కంపెనీల యాడ్స్ లాంటి విపరీతాలు ఉండేవి కావు.

రేడియో సిలోన్, వివిధ భారతిలో వచ్చే హిందీ పాటలు మరపురాని ఙాపకాలు.

పన్నెండున్నరకి మాధవపెద్ది సురేష్ గారు స్వరపరచిన కార్మికుల కార్యక్రమం ట్యూన్ వినపడిందంటే నాన్నగారు భోజనానికి వచ్చే టైమైందని గుర్తు.అందులో ఏకాంబరం, చిన్నక్క అని మాట్లాడుకుంటూ మధ్యలో సినీగీతాలు ప్రసారం చేస్తూ కార్మికులకి సంబంధించిన విషయాలని వినసొంపుగా చెప్పడం ఆ నిర్వాహకులకే చెల్లింది.ఆ తరువాత  పాడీపంట కార్యక్రమ వచ్చేది.

సాయంత్రం పూట  ఐదున్నరకి యువవాణి యువజనుల కార్యక్రమం వచ్చేది.ఏడుగంటలకి ఇల్లు-వాకిలి కార్యక్రం సిగ్నేచర్ ఫ్లూట్ ట్యూన్ ఇప్పుడు వింటే ఎంత ఆహ్లాదకరంగా అనిపిస్తుందో.అందులో ప్రసారమయ్యే పందుల పెంపకం, శాస్త్రీయ పద్ధతిలో గొర్రె పిల్లల పెంపకం లాంటి కార్యక్రమాల పేర్లు  విని నవ్వుకున్నా ఎంతో మందికి లాభాన్ని చేకూర్చిన కార్యక్రమం అది.

రాత్రి పూట ప్రసారమయ్యే బుర్రకథ, ప్రాయోజిత కార్యక్రమం, ఇంగ్లీషు వార్తలు, స్పాట్‌లైట్‌తో ప్రసారాలు ముగిసేవి.మినిట్ టూ మినిట్ అప్డేట్ లేకున్నా కానీ రోజులు హాయిగా సాగిపోయాయి.

శనివారం వస్తే "హైదరబాదు బాలలము రయ్ రయ్ మంటూ వచ్చాము" అనుకుంటూ వచ్చే బాలానందం, అందులో ప్రసారమయ్యే నాటికలు, ఆదివారం ప్రొద్దున్న పదకొండయితే చాలు,  మీరు కోరిన పాటలు వింటూ హోంవర్కు చేసుకోవడం మర్చిపోలేను.

రేడియోలో కొన్నేళ్ళపాటు సినిమా ఆడియోని ప్రసారం చేసేవారు, సినిమాలు చూసే అవకాశం లేని ఊళ్ళో ఉంటున్న మా లాంటి వాళ్ళకి అదొక పెద్ద వినోద కార్యక్రమం.ఆదివారం మధ్యాహ్నం మూడింటికి ప్రసారమయ్యే నాటకం కోసం ఎదురుచూసిన రోజులెన్నో.

మాటల మధ్యలో అడ్డుతగిలి వివాదాస్పదం చెయ్యాలని చూసే యాంకర్లు లేని ప్రముఖుల ఇంటర్వ్యూలు, పరిచయ కార్యక్రమాలు ఒకటేమిటి ఎన్నో మరిచిపోలేని కార్యక్రమాలని అందించిన ఆకాశవాణి ఎంతో మందికి ఒక మధురఙాపకం.

క్రికెట్టు మ్యాచులప్పుడు శ్రోతలని మునివేళ్ళమీద నిలబెట్టిన కామెంటరీని మర్చిపోతే ఎలాగ?

ఈ మధ్యే మళ్ళీ రేడియో వినడం మొదలుపెట్టాను.దాదాపు అవే కార్యక్రమాలు, కానీ కార్యక్రమాల క్వాలిటీ మాత్రం పడిపోయింది.దేశభక్తి గీతాలని రచించేవాళ్ళ, పాడేవాళ్ళ కొరతో మరేమిటో కానీ ఇంకా నలభై యాభై యేళ్ళ క్రితం నాటి గీతాలే వేస్తున్నారు.భక్తిరంజని పరిస్థితి కూడా అదే.ఇంకా దారుణం ఏమిటంటే ఒక కార్యక్రమం ఇంకా పూర్తి కాకుండానే మరొక కార్యక్రమం మొదలవ్వడం,కొంత మంది అనౌన్సర్లు కూడా  ప్రైవేట్ టీవీ యాంకర్లకి తీసిపోని తెలుగు భాషా పరిఙానంతో ఉన్నారు, అస్సలు వినసొంపుగా లేని సంస్కృత వార్తలు...ఇలా ఒకటేమిటి ఏదీ బాగుండటం లేదు.

దాదాపు అన్ని మారుమూల పల్లెలలోనూ టీవీ, ఇంటర్నెట్టు ఉంటున్న ఈరోజుల్లో రేడియో తన అస్థిత్వాన్ని కోల్పోయిందేమో అనిపిస్తోంది.కాకపోతే ఇంకా మొబైల్ ఫోనుకి సిగ్నల్ అందని గ్రామాలు కూడా ఉన్నాయి కాబట్టి అలాంటి ఊళ్ళలో ఉంటున్న పిల్లలకోసమైనా ఆకాశవాణి కేంద్రాలు తమ కార్యక్రమాలలో మార్పులు చేసుకుని పాఠాలు తదితర విషయాలు బోధిస్తే కాస్తయినా ఆకాశవాణి పూర్వవైభవాన్ని సంతరించుకుంటుందేమో.  

తన అస్థిత్వాన్ని కోల్పోయిన ఆకాశవాణి గురించి వేటూరి గారి మాటల్లో చెప్పాలంటే గతవైభవ దీప్తులతో వెలిగే కమ్మని కావ్యం.

Monday, June 28, 2021

వేయిశుభములు కలుగు నీకు

 




కొన్ని వారాలుగా మా ఇంట్లో పెనుమార్పులొచ్చాయి.వర్క్ ఫ్రం హోం, లెర్న్ ఫ్రం హోం లో భాగంగా మా ఇంటిపెద్ద(ఇం.పె.), యువకిశోరం(యు.కి.) చెరొక గదిలో ఉంటున్నారు.ఏదో నేను బయటకెళ్ళి తెచ్చిన శాకాలూ, ఫలాలూ తినేవారే కానీ ప్రత్యేకముగా ఇది కావాలి అని ఎప్పుడూ అడగలేదు.

ఒకానొకరోజు నేను మొదటిడోసు టీకా వేయించుకుందామని వెళ్ళినప్పుడు,వేల మైళ్ళ దూరములో ఉన్న మా అక్క కూతురు చక్కగా ముక్కలు కోసిన బంగినపల్లి మామిడి ఫోటో పెట్టగానే బయట నాకు తోడుగా వచ్చి కూర్చున్న మా ఇం.పె.కి పూనకం వచ్చేసింది.

అసలే పోయిన సంవత్సరం బంగినపల్లి మామిడి తినలేదు.మా ఊరికి వాటిని ఆకాశ మార్గం ద్వారా తెప్పించారని పోయినసారి మామిడిపళ్ళ ధరలని కూడా ఆకాశంలోనే పెట్టేసరికి మేము వాటి వైపు కూడా చూడలేదు.పోనీ ఒక నాలుగు పళ్ళైనా తెచ్చుకుందాము అనుకుంటూనే రజనీకాంత్ రాజకీయ ప్రవేశంలా అయ్యింది పోయిన సంవత్సరం మేము ఆంధ్రా మామిడిపళ్ళు కొనడం.కో.పూ.(కోవిడ్ పూర్వ శకం)లో తిన్న మామిడి రుచినే గుర్తుచేసుకుని గడిపేసి, వేసవిలో ఆంధ్రా మామిడిపండు రుచి చూడని పాపుల జాబితాలోకెక్కేసాము.

ఈ సంవత్సరం పరిస్థితులు కాస్త చక్కబడటముతో, మామిడిపళ్ళు మా ఊరికి ఆకాశమార్గం ద్వారానే వచ్చినా, ధరలు మాత్రం ఆకాశములో లేవు కానీ, నేలని ఆనీ ఆనకుండా దేవతల పాదాల్లా కొంచెం ఎత్తులో తేలుతున్నాయి.

టీకా పూర్తయ్యి నేను బయటకి రాగానే క్యాబ్ మాట్లాడి మా ఇం.పె.నన్ను పొదివి పట్టుకుని ఇంటికి తీసుకెడతారనుకుంటే "మామిడిపళ్ళు వచ్చాయేమో ఇండియన్ స్టోర్లో కనుక్కుందాము" అని తీసుకెళ్ళారు.

అంటే అన్నానంటారు కానీ, నాకు నర్సయ్య(పుంలింగ నర్సు)టీకా పొడిచాకా, నేను కటకటాల రుద్రయ్యలా కళ్లెర్రచేయటమో, యండమూరి నవలా హీరోలా దవడ కండరాలు బిగించడమో,వానపాటల్లో హీరోయిన్లా వణకడమో చేస్తానేమో అని, అవి కాకపోతే వంశగౌరవాలని గుర్తు చేసుకుని కొట్టుకున్న తొడలమీద తేలిన తట్టుల్లాంటివేమైనా వస్తాయేమో చూద్దామని నన్ను కాసేపు ప్రక్కన కూర్చోపెట్టిన టైములో మా ఇం.పె.వెళ్ళి కొనుక్కొచ్చేసి, మామిడిపళ్ళతో నాకు స్వాగతం పలికి ఉంటే ఎంత బాగుండేది?.

పైన చెప్పిన చిత్ర విచిత్ర విన్యాసాలేవీ నేను చెయ్యకపోవడముతో నన్ను బయటకి పంపగానే మా అడుగులు ఇండియన్ స్టోర్ వైపు పడ్డాయి.

అక్కడ బాక్సుల్లో పసుపు పచ్చగా మెరుస్తున్న బంగినపల్లి మామిడిపళ్ళని చూడగానే, 'పగ' ని తింటూ, త్రాగుతూ, పీలుస్తూ ఉన్న కథానాయకుడి తాతయ్య, కథానాయకుడు ఊర్లోకి వస్తున్నాడగానే, ఆ తాత ముఖములో మనకి కనిపించే ఉద్విగ్నత లాంటిదే సరిగ్గా మా ఇం.పె. ముఖములో కూడా కనిపించింది.

మేము మామిడిపళ్ళు కొనుక్కుని ఇంటికి రాగానే మా యు.కి. తన గుహలోంచి బయటకొచ్చి, "ఎలా ఉన్నావు?" అని నన్ను అడిగి, వెంటనే తన చూపు ఇం.పె.చేతిలో ఉన్న డబ్బా మీదకి త్రిప్పాడు.

ఇక్కడ మామిడిపళ్ళు విడిగానూ లేదా 5 కేజీల బాక్సు( డబ్బా)లలో అమ్ముతారు.కాయ సైజుని బట్టి 8-10 కాయలుంటాయి ఒక్కో డబ్బాలో.ఆరోజునుండీ వంటింటి గట్టుకి భూషణమయ్యి కూర్చుంది మామిడిపళ్ళ డబ్బా.

డబ్బా తెరవగానే ఇది నాది, అది నీది అని ఇం.పె.&యు.కి. వాటాలేసేసుకున్నారు.పళ్ళు ఇంకా మగ్గలేదేమో రోజూ భోజనం తరువాత చెయ్యి కడుక్కుని, వేసవిశలవల్లో పుట్టింటికొచ్చిన ఆడపిల్లని చూసినంత సుకుమారముగా డబ్బా తెరిచి పళ్ళు మగ్గాయేమో చూసుకునేవారు మా ఇం.పె.

ఎదురుచూసిన రోజు రానే వచ్చింది, ఇం.పె, యు.కి. ల రసాస్వాదన మొదలు. నేను కూడా పోటీలోకొచ్చేసరికి మా త్రిశూల వ్యూహానికి అల్లాడిపోయిన బాక్సులో మామిడిపళ్ళు మా గుండ్రటి బొజ్జల్లోకి దూరెస్తే, మామిడిపపళ్ళ డబ్బా రీసైకిల్ బిన్‌లోకి ఎగిరేది.

ఇక అది మొదలు, మా ఆర్డర్లు చూసిన ఆ స్టోర్ యజమానులు "మీరు రావక్కర్లేదు, ఫోనులో చెప్పండి, పంపించెస్తాను" అని వరం ఇచ్చేసారు.

డబ్బాలో పళ్ళ సంఖ్య 2-3 కి పడిపోగానే ప్లేట్లెట్స్ పడిపోయినట్లు కంగారు పడిపోయి "మామిడిపళ్ళ వాళ్ళకి ఫోను చేసావా?" అని అడిగేవాడు మా యు.కి.ఒకోసారి డబ్బా ఖాళీ అయ్యేసరికి అభిమాన హీరో సినిమా టిక్కట్లు దొరకని అభిమానిలా దిగులుగా నిద్రపోయేవాడు పాపం.

వంటింటి గట్టు మీద మామిడిపళ్ళ డబ్బా కనపడక, నేనేమైనా రహస్య నేల మాళిగలోనో, ఫ్రిజ్జులోనో, ఇంకెక్కడో పెట్టానేమో అని వెతికేసుకుని "మామిడిపళ్ళు అయిపోయాయా" అని మా ఇం.పె. నన్ను అడిగి, "అ...యి...పో...యా....యి...." అని నా నోట్లోంచి రాగానే, రేప్పొద్దున్న లేచేసరికి టీపొడి లేదంటే టీ ప్రియులైన మా అక్క, బావగార్ల మొహములో కనిపించే దిగులు కంటే ఎక్కువ దిగులు కనిపించేది మా ఇం.పె. ముఖములో.

ఫోను చేసి చెప్పగానే, జీ హుజూర్ అని నిమిషాల్లో మామిడిపళ్ళు తెచ్చి నా ముందర పడెయ్యడానికి నేనేమన్నా ప్రధానమంత్రినా?వాళ్ళకి వీలైనప్పుడు తెచ్చిచ్చేవారు.ఒకోసారి మేమే వెళ్తే, "మేడం, మామిడిపళ్ళు ఈరోజు రాలేదు, నేను ఇంటికి పంపిస్తానని చెప్పాను కదా" అనడంతో వెళ్ళడం మానేసాము.

ఒక్కోరోజు రాత్రి పదకొండింటికి మా ఇంట్లో లైట్లన్నీ వెలిగేవి.అప్పటివరకూ నిద్ర పోతున్న(నటిస్తున్న) మా యు.కి.లేచి ఏమీ తెలియనట్లు బయటకొచ్చి చూసి, అందరం మంగళహారతులు పాడుతున్నట్టు నిల్చున్నామంటే మామిడిపళ్ళ డెలివరీ అని అర్ధమయ్యి, "అమ్మా! రేపు నాకు పెద్దది కావాలి" అని చెప్పి ‘తియ్యటి’ కలలు కంటూ ప్రశాంతముగా నిద్రపోయేవాడు.

ఈ మామిడిపళ్ళ పుణ్యమా అని భోజనాలు మానేసి కేవలం ఫలాలు మాత్రం ఆరగించి ఉపవాస పుణ్యాలు మూటగట్టుకున్న రోజులెన్నో.ఇంట్లో పాలున్నాయా, పప్పులున్నాయా , బియ్యమున్నాయా, కూరలున్నాయా అని చూసుకోవడం మానేసి "మామిడి పళ్ళున్నాయా?" అని ఎప్పటికప్పుడు చూసుకోవడం సరిపోయింది.

ఏమాటకి ఆ మాటే చెప్పుకోవాలి, పళ్ళు మాత్రం అద్భుతమైన రుచితో ఉన్నాయి.అంత తియ్యటిపళ్ళలోనూ అప్పుడప్పుడు మాత్రమే వచ్చే మంచి తెలుగు సినిమాల్లా, కాస్త పులుపు కూడా తగిలేది.

అయినా బంగినకి మరీ బడాయి కాకపోతేను, యాప్లీసు కాయలు సంవత్సరమంతా దొరికెస్తున్నాయి, పుచ్చకాయలూ అంతే, ఇది మాత్రం సంవత్సరానికి ఒక్కమారే దొరుకుతుంది.

'ఆల్' ఫోన్సాలు, 'సం' ఫోన్సాలు అన్నీ దిగదుడుపే మా బంగిన ముందు.ఇంక రసాల సంగతి చెప్పకండి, ఒబ్బిడిగా తినడం రానివాళ్ళ దగ్గర ఒక్కసారి కానీ కూర్చున్నారా, జీవితం మీద విరక్తి రావడం ఖాయం.

కానీ బంగినకి ఆ ఇబ్బందులేమీ ఉండవు.మీకు ముక్కలు కోసే కళ చేతనవ్వాలే కానీ అద్భుతంగా ఉంటుంది రంగు, రుచి, రూపు కూడా. బంగినపల్లి వాసనకి ఇక ఎదురేముంది?
అదిగో జూన్ వచ్చేసింది ఇక ఇప్పుడు మామిడిపళ్ళు బాగోవు, అప్పుడే జూన్ నెల సగం అయిపోయింది ఇంక బంగినపల్లి కాపు ఆగిపోతుంది...ఇలా ఎప్పటికప్పుడు ఇంక మళ్ళీ ఈ సంవత్సరానికి దొరకదేమో అనుకుని ఆర్డర్ ఇస్తూనే ఉన్నాము.
జూన్ నెల ఆఖరుకి వచ్చేసరికి వాటి రుచి ఈ మధ్య వస్తున్న మణిరత్నం సినిమాల్లా ఉండటముతో, మొత్తానికి ఈ సంవత్సరానికి బంగినపల్లికి టాటా చెప్పే రోజొచ్చింది అని మైకులూ, బల్లలూ విరగ్గొట్టక్కర్లేకుండానే ఏకగ్రీవముగా నిర్ణయించుకున్నాము.

బేగొచ్చీసీ బంగినా, బెంగెట్టేసుకుంటాను మరి..ఆ..


వేయిశుభములు కలుగు నీకు పోయిరావే బంగినపల్లి మామిడి అని పాడుకుంటూ ఈ సంవత్సరానికి మంగళం పాడెస్తున్నాము

మంగళం ఫలరాజాయ మహనీయ రుచాత్మనే
ఫలచక్రవర్తాయ సార్వభౌమాయ మంగళం


Monday, February 1, 2021

మెరుపుకలలు సినిమా పాటలో వేటూరి గారు వ్రాసిన ఈ వాక్యానికి అర్ధం ఏమిటి?

 


అపరంజి మదనుడే పాట


మెరుపుకలలు సినిమాలో "అపరంజి మదనుడే" అనే పాటలో పాటలో  వేటూరి గారు "కన్నీటి గాయాలు చన్నీటితో కడుగు శిశుపాలుడొచ్చినాడే" అని రాసారు. ఏసు గురించిన పాటలో  శిశుపాలుడు ఎందుకొచ్చాడు? కన్నీటి గాయాలు చన్నీటితో కడగటం వెనుక ఏమైనా కథ ఉందా లేక తాను ఇచ్చిన ట్యూనుకి అనుగుణముగా పదాలని ఇరికించాల్సినదే అని మెడమీద కత్తిపెట్టిన రెహ్మానుడి కోసం రాసిన పదాలా ఇవి?వేటూరిగారు మరీ ఇలా తలా తోకా లేకుండా రాస్తారా?ఏసుని,శిశుపాలుడిని కలపడం ఏమిటి?లేకపోతే ఇది "శిశుబాలుడు" అని రాస్తే గాయని "శిశుపాలుడు" అని పాడిందా?మ్యూజికాలజిస్టు రాజా గారు  "శిశిపాలుడు" అని ఇచ్చారు తన బ్లాగులో.మళ్ళీ ఇదో సందేహము,శిశిపాలుడు అంటే అర్ధం ఏమిటని.

అలాగే కన్నీటిని చన్నీటితో కడగడం అంటే?